مەخمۇت سۇلايمانغا مەرسىيە

ئەخمەتجان ئابدۇرەھىم

ۋاھ ئېسىت بۇ يۇرت ئارا بولدى مۇسىبەت بۇنچە زور ،

بىزدە ماختاشقا سازاۋەر قانچە ماھمۇت بار ئىرۇر .

ۋاقتىكىم كەتتى مانا مىسلى سۇلايمان نەسلىدۇر ،

ھەر زەبەردەسلەر بارار جايى-قارا يەر قوينىدۇر .

كاشىغەر مەشھۇرلىرى بولمىش ئېسىللاردىن ئىدىڭ ،

شەۋكىتىڭ شانىڭ راسا بولغان غۇرۇرنىڭ كانىدۇر .

قىلمىشىڭ ناخشاڭ بىلەن تۇرقۇڭ بىلەن بولماس ئەبەت ،

بەلكى شۇ خىسلەت بىلەن قالغان نەمۇنە ئىزدىدۇر .

تاپمىدى كىملەر جاھان سەيناسىدا نامۇ نەسەپ ؟!

كەتمىدى جىمجىت يەنە ئاخىر بارا جايىغىدۇر !

قانچىلاپ دەيمىز قارا، يوق بولدى سەن ئېيتقان قارا ،

سەن بىلەن كەتتى قارا مەنزىلگە ھېچ كەلمەسكىدۇر .

ۋاھ ئېسىت ! مەخمۇت ئۈچۈن ئەخمەت يۈرەكتىن قايغۇرۇر ،

بۇ ھايات بىر ناخشىدۇر ، كىم ياخشى كىم ئارماندىدۇر .

قەشقەر

2020-11-23

مەرسىيە

ئاتاقلىق ناخشىچى ، كومپوزىتور مەخمۇت سۇلايمان ۋاپاتىغا

دىلمۇرات نۇرئابدۇللا

ئاھ ئەجەپ تېز كەتتىڭىز ئەي ئۇيغۇرۇمنىڭ ھافىزى ،

يىغلىدى تاڭدا يۈرەك كۆچتى سامانىڭ يۇلتۇزى .

قەشقىرىم ئوغلانلىرى ھەم سەركىسىز قالدى بۇدەم ،

ۋەھكى ھەر تىللاردا داستان مىڭ « رىۋايەت » نىڭ ئىزى .

ئاھ نىچۈك « بۇ چۈش ئەمەس » كۈيلەر پىغان قىلماقتىدۇر ،

« مەيلىمۇ » دىل ئۆرتىسە ھەسرەت ئىلە تۈن - كۈندۈزى .

بۇ زىمىستان كەتسە ئاچىلغايمۇ « نەۋرۇزنىڭ گۈلى » ؟

قاتتى نەملىك مۇز بولۇپ ھەر كۈيخۇمارلارنىڭ يۈزى .

ۋادەرىخا ناخشىڭىزدەك ئۆمرىڭىز « بەش يۈز » ئەمەس ،

ئەي مۇراد قىلغىن سۇبات ، بۇ جۇدالىقنىڭ ئۆزى .

2020   .   11   .   23